Nchexroä iso nketín ti chjaséni
Ti chjasin San Juan atzingo, la itjen ti Estado Ṭꞌáni̱nka, jnko ite minuto kjíxi̱n itjen ti municipio Ijnki (San Gabriel Chilac),
la ko éxi jnko 39 km kjíxi̱n itjen ti chjasin Nda̱chjina.
Ti chjasin Atzingo la kohya itsjé inta, imá siin ixro̱ la ko chjina kuenṭé nánó la sóa, ti chjasin a la itjen jnko 1460 métro noixín ke ti nda̱ñao.
Ti chjasin Atzingo, la éxi 95% ti chojni la na̱xa̱ nixja sin ti ngíva kuènṭé sin, ndesi ti xjan ntsíntsí, ndasoá, ṭjarisoá, sin ṭáda la ko nána, la nixja sin ti ngíva kuènṭé sin, á tjejó sin ndo̱e sin, ixra̱ kuènṭé sin o̱ ti ó xripaseán sin.
¿Nke ixra̱ ichꞌe ti sin Atzingo?
Ti sin chjasin Atzingo, la iṭjo̱n sin kalótón, ṭjo̱xin sin itja sin la íso sin la máki̱na̱, íso sin tꞌakitsje ixro̱, íso sín chꞌéna sin tja̱tꞌo̱, íso sin la ichꞌe sin ixra̱ ókjé chjasin, la kja̱xin itsjé sin la sátji sin norte ichꞌe sin ixra̱ kixin tsjacha sin sichꞌéna sin ndo̱e sin.
¿Nkehe ṭꞌóna ti nte̱je̱ Atzingo inie chojni?
Ti chjasin Atzingo mé ṭꞌóna tontí, tontí palóma, tsjo̱nto̱í, tsochje, tsjoxrahyo chjo̱n, tsjoxrahyo inta, tojma, ichje, chjekíchí, chjenáchrí, chi̱chi̱n, totsói, lókán, chjexe, chjekotꞌo̱, chjenoa, nchi̱tsje̱enchíxín, nchejni, nchenìnta̱, nchitsje nte̱je̱.
¿Nke iko siín ti nte̱je̱ Atzingo?
Ti nte̱je̱ Atzingo mé siín kolótse̱, koxrála, tsꞌaja, konche, kotsi̱ka̱rꞌe̱, koxi̱jna, koṭónchi nte̱je̱, kochíndoá, konchi̱a̱, tsi̱ka̱rꞌe̱ najan, kotsi̱ka̱rꞌe̱jnte̱, xróntá, ntákján, kontóji, koxroxé, kochikírꞌi̱, kontóá, la íso va.
¿Nke ni̱nko siín ti chjasin Atzingo?
Evangélica, bautista, Católico la ko íso grupo ntsíntsí.
¿Nke nda̱xra nchechján sin ti chjasin Atzingo?
Ti chjasin Atzingo mé nchechján sin ti nda̱xra ntájno, nda̱xra kotèntso̱, nda̱xra kochjoá, nda̱xra kolótse̱.
