Jahara chojni jína chrókócháhara, chrótsjera.
Náxrjón kixin kaín a̱sén chojni chrókjuikosáyehe sin Itꞌéni Díos. Chrótsjera, chrókjuíkosáyehéra Díos la ko itꞌinra arpa.
Itsjera himno la ko itꞌinra ison chónta itsja. Chrótsjera ijnko canto ni̱xin la chrókꞌuinra arpa la ko chrókócháhara kixin
ti itén Itꞌeni Díos la chaxín ndoá.
Ti ixra̱ ichꞌe chꞌan la tja̱ko̱xi̱n kixin chaxín jína chꞌan. Itꞌéni Díos la tjue̱he ti chojni jína la ndoá tjejó la ko ti̱konóe̱he̱ chꞌan kaín chojni kuenté chjasintajni. Ti nixja Itꞌéni Díos mé kꞌónaxín nka̱jní la ko kaín ti nkehe siín nka̱jní mé kꞌónaxín ti itan kꞌuaxrjexín irꞌua Díos. Díos kjuínchenkojié ti nda̱ñao la ko kjuíchꞌéna ti tjiá ti ìnta̱. Méxra̱ kaín chojni siín kuenté chjasintajni chrókjuikosáyehe sin Itꞌéni Díos la ko chróchjéhe sin chꞌan kjuasáya.
Salmos 33:1-8
